Partij Burgers in Vrijheid 'PBV'
E-mail: partijburgersinvrijheid#gmail.com
Tel: 560-3914 

Destrukshon konsiente             

Bo no mester ta polítikamente interesá pa bo ripará ku ta destruyendo nos islanan 
sistemátikamente. Ta basta kla ku tin un lantamentu di pueblo na kaminda.

Kiko ta pasando?
               Si bo wak djis na Kòrsou so, bo ta mira ku ta instigando poblashon lokal 
               kontra kolonialismo kapitalista. Un PS, un MAN i algun partido chikí ta 
               zundra, habri afó i kibra tur loke e isla ta i tin aktualmente. Un isla ku tabata 
               un baranka bashí i ku awor ta un isla ku mas o ménos 140.000 hende. 
               Nunka no tabatin un desunion asina grandi manera aworakí.

Kiko tin tras di tur e kosnan aki?
               Nos ta un sumpiña den wowo di polítika hulandes/europeo. Nos no ta sigui 
               òrdu manera katibu na e manera ku e komunidat europeo ta deseá.  
               Hulanda no por djis dùmp nos, pasobra tin tratadonan ku ta impedí esei. 
               T'asina ku Hulanda tabata hopi sosial promé i a purba di logra mantené e 
               dominashon ku 5 mil mion florin, hañando algun partido pa bai nan tras
               gustosamente. Pero e asuntu ta hopi mas profundo di loke ta parse,
               pasobra nos tin petroli i gas i lógikamente mester chika esei. Niun problema 
               ku esei: nos ta formulá kosnan di tal manera ku na kualkier momentu nos por 
               kuminsá kosechá.

Mientrastantu nos ta instigá poblashon kontra otro (desunion), pero nos ta instigá 
poblashon na Kòrsou kontra makambanan tambe (PS i MAN).

Ta pa ken su benefisio?
               Loke en todo kaso ta kla, ta ku Hulanda ke sali for di nos. I esei no por sosodé 
               di un manera reglamentario. Pero afortunadamente nos tin un partido PVV di 
               sr. Wilders i un sr. Brinkman ku sí sa kon pa atendé ku e asuntu ei. E idea ta pa 
               infiltrá den polítika lokal i barka un grupo di hulandes ku no ta esnan mas 
               simpátiko i konstruktivo pa nos isla, via di un sistema di benefishinan fiskal 
               enorme. Hulandesnan ku atrobe ta bin lanta kolonianan, ku ta biba den kasnan 
               di balor mionario i ku ta kana rònt laga sa ku tur kos por otro i mihó. 
               Bingo, e base t'ei. Bo tin e poblashon lokal ku ta ser oprimí, humiá i tené bobo 
               i algun partido ku ta instigá e poblashon lokal aki kontra hulandesnan.

Pakiko?
               Ku e rebelion ku partidonan lokal ta kreando, Hulanda lo no hasi masha kos. 
               E rasonamentu ta: nan ke sigui nan so, awèl nan por dal bai nan so! E òrdu ku 
               marina a haña tambe ta ilustrá esaki; paketá, tuma hulandesnan ku ke bai bèk i 
               sali for di einan. Ata nos e ora ei, un isla den rebelion, bringando kontra nos mes 
               i kabando i matando tur kos innesesariamente! Den un palabra, un di dos Haiti. 
               Un di dos Haiti ku lo resultá den un spiral desendiente mas grandi si.

Kiko Hulanda tin di gana ku esaki?
               -Esunnan ku ta grita mas duru, e figuranan korupto i esunnan molestioso mes 
                lo eliminá otro.
               -Hulanda internashonalmente lo no karga responsabilidat mas pa e situashon 
                kaótiko ku a surgi.
               -Por saka petroli i gas tòg for di awanan teritorial di nos isla i un pais bankarota 
                manera Kòrsou lo no tin e rekursonan finansiero nunka pa e mes tuma akshon.
                Den un palabra: PROBLEMA SOLUSHONA PA HULANDA.
                Ta tristu ku un partido polítiko hulandes ta instigá partidonan lokal pa pone  
                poblashon rebeldiá.

Un invento, un fantasia?
               Lástimamente nò, shonnan. Di un kombersashon ku mi tabatin ku sr. Brinkman
               (3 yanüari 2009, 11 or, na Avila Hotèl) mi por a sak'afó ku e tabata ke pa ami 
               hasi e trabou sushi aki p'e. Mi a gradisí pa e honor ei, pasobra mi stima mi isla, 
               un isla ku yama Kòrsou.