Esaki ta algu ku nunka ta zona dushi den nos orea. Komo ku un prezu ta keda un
prezu i mester akseptá kiko ta pasa ku n'e aya den prizon. No lubidá ku ta eksistí
tambe algu ku yama derecho humano i den nos prizon Bon Futuro ta hopi kos
inhumano ta tuma lugá.
Movementu Kontra Korupshon na mart 2009 a yama atenshon pa e kaso aki den
prensa lokal i
internashonal. Nos a haya kartanan di vários polítikonan hulandes ku nan lo bai
investigá e kaso aki.Tambe nos tabata tin un kombersashon ku minister di hustisia
señor Dick i Prokurador General señor Piar. Tur dos a bisa klaramente ku nan ta
na altura di e 54 deklarashon kontra bewaker i maneho di Bon Futuro, pero nan
mes no por hasi nada komo ku e sindikatonan no ta kolaborá.
Medidanan a ser tuma i hasta tin personanan ku a haya nan retiro. Hulandesnan ta
patruya te dia di awe, pafó di e prison, riba dak. No ta safe, nan a bisa nos.
Nos minister di hustisia señora Jacoba adelantá ta anunsiá ku aki un luna nan lo
bai hasi e prizon limpi. Ta ki wega polítika esaki ta, ta ki intenshon nan tin; ta
krítikonan ku ta bin fo'i Hulanda. Ta ken ta bai anunsiá ku ta bai bini un akshon di
limpiesa.
Klaro ku nos prezunan tambe a bin ku akshon komo nan sa ku no ta den nan sel
so mester hasi limpi pero sigur serka e bewaker i e maneho. Tin un lista konosí ku
nòmbernan di bewaker i di direktiva korupto ku ta traha den prizon. E lista ta mustra
e nòmbernan ta ken ta laga kosnan sali afó pa sierto preis i ken ta hiba kosnan afó
pa bende.
E sindikatonan ta bini ku un kontra ofensiva i reprochenan ta skeiru. Falta di personal
i tambe ku ta eksistí un diferensha den klase entre e prezunan. Pero ta ken ta permití
esaki? Ta e bewakernan i e direktiva tòg? For di e 54 deklarashonnan ta opviamente
klaro ku ta via bewaker TUR merkansia ta drenta i sali. Miéntras tantu e PG i minister
ta bisa. Mi ta sita; "Pero nos no tin pèrmit di e sindikatonan". Anto e ora nos ta puntra
nos mes, unda nos siguridat ta komo siudadano. Ainda riba esei, un minister di
hustisia ku adelantá ta anunsiá ku nan ta bai hasi un akshon di limpiesa. Ku esaki bo
ta puntra bo mes ta unda e nivel di nos polítikonan ta awendia.
Algun luna pasa MKK a hasi menshon ku hopi arma a yega den prizon. I tambe ku ta
preparando disturbio i hasta ku por tin mortonan. Ningun di nos polítikonan a
reakshoná, tampoko e instanshanan responsabel. E ora bo ta puntra bo mes ta ki sorto
di gobernante nos tin i hasta un PG tin miedu di sindikatonan.
E kaso Bon Futuro ya ta kanando 10 aña. Bon Futuro ta ser goberná dor di bewakernan
alias sindikatonan. Ta nan tin poder aya den i a krea nan mes mundu a kosta di nos
prezunan. Okay, bo a ser sentensha pero ainda ta eksistí algu manera derecho humano.
Mi por komprondé e prezunan, mas ainda ora ku mi a tende for di nan mes loke ta
pasando den e landfill inhumano di korupshon.
Prezu, defendé bo derechinan pasobra aunke ku bo tin un pasado, nos tur ta hende si.
Boso tin rason, e korupshon nos mester kuminsá solushon'é for di ariba.
