E arogansia di nos polítikonan pa nos poblashon
Pa nos polítikonan, nos siudadano ta solamente importante den tempu di votamentu.
Bo komentario lo ta atrobe; esei no ta nada straño. No ta mas ku normal ku nos
siudadano mester haña e rèspèt i e desensia di nos polítikonan?
Basta tempu pasa un peon di PAR a bisa mi ku kartanan dirigí na nos polítikonan
mester ta skirbí
segun norma i mester ta kumpli na sierto demanda. Si esaki no ta e kaso, nan ta
benta e kartanan ei afó i nan no ta hasi nan esfuerso pa manda kontesta; e shon aki
a sigui den mes un rosea. Ora ku mi a hasi e pregunta ta kon e kartanan aki mester
ta skirbí mi a haña komo kontesta ku e siudadano mester sigui un kurso ku nan mes
ta duna.
Ya ta basta tempu kaba bèrdat, ku riba kartanan dirigí na gobièrnu bo no ta haña
kontesta. Ni sikiera un konfirmashon bo ta haña ora ku bo manda un karta registrá
òf entrega personalmente
na gobièrnu. Gabinete di Gobernador ta e úniko instansia ku ta traha ku rèspèt.
Di e instituto aki si bo ta haña un konfirmashon na kas ku nan a risibí bo karta.
Bueno, ami por bisa ku nunka mi a haya un kontesta, ni un konfirmashon riba tur e
kartanan ku mi a yega di manda pa nos polítikonan.
Riba e kartanan ku mi a manda komo siudadano pa; La Reina, Gobernador, Merka,
Parlamento Europeo, Papa, komo tantu pa otro polítikonan den mundu i komishonnan,
mi por bisa, ta masha poko mi no a haña kontesta, a lo ménos mi a haña un
konfirmashon ku e karta a yega.
Kiko bo por nota despues di e kombersashon aki ku e tal peon di PAR? Ta bèrdat
ku ta masha
tiki polítikonan ta kontesta un karta. Opviamente ta masha karta di nos, siudadano,
ta bai direktamente den ko'i sushi. Esei nos ta yama arogansia i peor ainda sin
rèspèt pa e siudadano.
Ta e siudadano ta duna bo, komo polítiko, bo kuminda i e mester por konfia bo.
Wèl ta parse ku hasta polítikonan ta hasi esaki ku nan mes kolega polítiko, kaminda
nan ta manda otro karta sin haña kontesta. Esaki nos por a nota serka un miembro di
MAN kende a bolbe manda un karta ku mesun preguntanan.
Mi pregunta ta; Ta fo'i unda nos polítikonan ta bin ku e arogansia ei ku nan ta permití
nan mes ku
nan no tin e fasun pa e siudadano i nan kolega polítiko? Ta kon siudadano por duna
rèspèt na nos polítikonan ku ta deshasí di nan karta pasobra nan no ta skirbí segun
norma? By the way, tin norma anto? E úniko norma ku tin mundialmente ta e rèspèt
pa otro i un bon manera na otro.
RÈSPÈT, dama i kabayero polítikonan i nan gobièrnu.
RÈSPÈT bo no por forsa pa haña, rèspèt lo bo meresé ora ku bo mes duna e ehemplo.
